കൊറോണ; 24 മണിക്കൂറിനിടെ 97,570 പുതിയ കേസുകള്‍; രോഗമുക്തരുടെ എണ്ണം 36 ലക്ഷം കടന്നു

രാജ്യത്ത് രോഗബാധിതരുടെ എണ്ണത്തില്‍ വീണ്ടും വര്‍ധനവ്. കഴിഞ്ഞ 24 മണിക്കൂറിനിടെ 97,570 പേര്‍ക്കാണ് രോഗബാധ സ്ഥിരീകരിച്ചത്. ഇതോടെ രാജ്യത്ത് ആകെ രോഗബാധ സ്ഥിരീകരിച്ചവരുടെ എണ്ണം 46 ലക്ഷം കടന്നു. 46,59,985 കേസുകളാണ് രാജ്യത്ത് ഇതുവരെ റിപ്പോര്‍ട്ട് ചെയ്തിരിക്കുന്നത്. കഴിഞ്ഞ 24 മണിക്കൂറിനിടെ 1,201 പേര്‍ക്കാണ് കൊറോണ വൈറസ് ബാധയെ തുടര്‍ന്ന് ജീവന്‍ നഷ്ടമായത്. ഇതുവരെ 77,472 പേരാണ് വൈറസ് ബാധിച്ച് മരിച്ചത്. 36,24,197 പേര്‍ രോഗമുക്തി നേടി. നിലവില്‍ 9,58,316 പേരാണ് രാജ്യത്തെ വിവിധയിടങ്ങളില്‍ ചികിത്സയില്‍ കഴിയുന്നതെന്നും കേന്ദ്ര ആരോഗ്യ മന്ത്രാലയത്തിന്റെ കണക്കുകള്‍ വ്യക്തമാക്കുന്നു. രോഗമുക്തരാകുന്നവരുടെ എണ്ണവും ചികിത്സയിലുള്ളവരുടെ എണ്ണവും തമ്മിലുള്ള വ്യത്യാസം വര്‍ധിക്കുകയാണെന്നും രോഗം സ്ഥിരീകരിച്ചവരില്‍ നാലില്‍ മൂന്ന് പേരും രോഗമുക്തി നേടിയതായും ആരോഗ്യ മന്ത്രാലയം അറിയിച്ചു.