ജനിതകമാറ്റം സംഭവിച്ച കൊറോണ വൈറസ്; കേരളത്തിൽ പഠനം പുരോഗമിക്കുന്നു

കൊറോണ വൈറസിൻറെ ജനിതകമാറ്റത്തെക്കുറിച്ചുള്ള കേരളത്തിലെ പഠനം പുരോഗമിക്കുന്നു. പതിനാല് ജില്ലകളിൽ നിന്നുമുള്ള സാമ്പിളുകൾ പരിശോധിച്ചുവരികയാണ്. ഡൽഹി ആസ്ഥാനമായ ജിനോമിക് ആൻറ് ഇൻറഗ്രേറ്റീവ് ബയോളജിയുമായി സഹകരിച്ചാണ് പഠനം പുരോഗമിക്കുന്നത്. ആർ എൻ എ വൈറസിന്റെ പ്രത്യേകതയാണ് അടിക്കടിയുള്ള ജനിതകമാറ്റം. ബ്രിട്ടനിൽ കഴിഞ്ഞ നാല് മാസത്തിനിടെ കണ്ടെത്തിയത് നാലായിരത്തിലധികം പുതിയ കൊറോണ വകഭേദമാണ്. കേരളത്തിൽ കോഴിക്കോട് മെഡിക്കൽ കോളേജിൽ നടത്തിയ പഠനത്തിൽ വൈറസിൻറെ ചില വകഭേദങ്ങൾ കണ്ടെത്തിയിരുന്നു. ഇതിൻറെ അടിസ്ഥാനത്തിലാണ് ഡിസംബർ അവസാനത്തോടെ പഠനം ആരംഭിച്ചത്. പതിനാല് ജില്ലകളിൽ നിന്നും 25 സാംപിംളുകൾ, ഒരു മാസം 1400 സാംപിളുകൾ എന്നിവ ജനറ്റിക് സ്വീകൻസ് ചെയ്യും. സ്രവ സാമ്പിൾ ശേഖരണവും നിരീക്ഷണവുമെല്ലാം എൻ എച്ച് എമ്മാണ് നടത്തുന്നത്. ബ്രിട്ടനിൽ കണ്ടെത്തിയ അതിതീവ്ര വൈറസ് കേരളത്തിലും സ്ഥിരീകരിച്ചിട്ടുണ്ടെങ്കിലും ഗുരുതരാവസ്ഥയിലാകുന്നവരുടെ എണ്ണം കൂടുന്നതായി കണ്ടെത്തിയിട്ടില്ല അതുകൊണ്ടുതന്നെ ചികിത്സാരീതിയിലും മാറ്റം വരുത്തിയിട്ടില്ല. പ്രത്യേക സാഹചര്യത്തിൽ കേരളത്തിൽ പരിശോധനകളുടെ എണ്ണം പരമാവധി വർധിപ്പിക്കണമെന്ന ആവശ്യവും ഉയരുന്നുണ്ട്. കൃത്യമായ മുൻകരുതലുകൾ സ്വീകരിക്കാത്തതിനാലാണ് കേരളത്തിൽ വൈറസ് വ്യാപനം രൂക്ഷമാകുന്നതെന്നാണ് ആരോഗ്യവിദഗ്ധരുടെ വിലയിരുത്തൽ.